अब नेपालीले भारतीय विमानस्थल हुँदै विदेश जान नपाउने

नेपालीले स्थलमार्ग हुँदै भारत प्रवेश गरी तेस्रो मुलुक उड्न नपाउने भएका छन् ।

भारतका लागि नेपाली राजदूतावासले एक विज्ञप्ति जारी गर्दै नेपालबाट स्थलमार्ग प्रयोग गरी भारत प्रवेश गरी तेस्रो मुलुक उडान गर्न खोज्दा आइपर्न सक्ने समस्याबाट बच्नका लागि त्रिभुवन अन्तर्राष्ट्रिय विमानस्थलबाटै उडान गर्न अनुरोध गरेको छ ।

खुला सीमानाका कारण कतिपय नेपालीले भारतीय विमानस्थलको प्रयोग गरी तेस्रो मुलुक उड्नका लागि पुग्ने गरेका छन् । तर अब भारत हुँदै तेस्रो मुलुक जान नपाइने भएको हो ।

मध्यपूर्वका साउदी अरब, कतार, कुवेत, संयुक्त अरब इमिरेट्स लगायत नौवटा देशहरुमा भारतीय विमानस्थल प्रयोग गरी उड्नका लागि नेपाल सरकारले रोक लगाएको छ । तर वैदेशिक रोजगार विभागको श्रम स्वीकृतिको स्टिकर लगाएर आएका नेपालीलाई दूतावासबाट नो अव्जेक्सन सर्टिफिकेट बाट उड्न पाउने गरेका छन् । बाँकी देशहरुको हकमा राहदानीमा भारतीय अध्ययागमनबाट भारत प्रवेश गरेको छाप लगाउनु अनिवार्य गरिएको दूतावासले जनाएको छ ।

भारतसँगको खुला सिमाको दुरुपयोग गर्दै मानव तस्करीसमेत हुने गरेको भएकाले नेपाली नागरिकको प्रस्थान अनुमति सम्बन्धमा नेपालको अध्यागमन विभागले स्थलमार्गबाट भारत जानेको राहदानीमा प्रस्थान छाप नलगाउने व्यवस्था कार्यान्वय गरेको छ ।

पछिल्लो समय भारत हुँदै तेस्रो देशमा मानव तस्करी बढेको समाचारहरु सार्वजनिक भइरहँदा सरकारले कडाइ गरेको छ ।