- बिहिबार, भदौ ४, २०८३ / Thursday, Aug, 20 ,2026
महोत्तरीमा अज्ञात समूहको गोली प्रहारबाट एकजना घाइते भएका छन् ।
महोत्तरीको मनरा सिसवा नगरपालिका–३ मा अज्ञात समूहले गोली प्रहार गर्दा स्थानीय ६१ वर्षीय सहदेवप्रसाद यादव घाइते भएका हुन् ।
शौचालय जान निस्केका बेला यादवमाथि गोली प्रहार भएको जिल्ला प्रहरी कार्यालय महोत्तरीले जनाएको छ। यादवको छातीमुनि गोली लागेको छ ।
घाइते यादवको जनकपुरस्थित जानकी हेल्थ केयरमा उपचार भइरहेको र अवस्था खतरामुक्त रहेको प्रहरीले जनाएको छ । प्रहरीले घटनास्थलबाट चाइनिज पेस्तोलको दुई राउण्ड गोलीका खोका र एक राउण्ड गोली बरामद गरेको छ ।
गोली कसले र किन प्रहार गर्यो भन्ने अनुसन्धान भइरहेको प्रहरीले जनाएको छ ।
