- बिहिबार, भदौ ४, २०८३ / Thursday, Aug, 20 ,2026
विदेशबाट फर्किएका चार जनालाई कोरोना भाइरसको आशंकामा टेकुस्थित आइसोलेसन वार्डमा राखिएको छ।
शहिद शुक्रराज ट्रपिकल तथा सरुवा रोग अस्पतालमा कोरोना संक्रमणको आशंका गरिएपछि विदेशबाट फर्किएका ४ जनालाई भर्ना गरिएको हो। अस्पतालका प्रवक्ता अनुप बाँस्तोलाका अनुसार ती मध्ये ३ जना दक्षिण कोरियाबाट फर्किएका र एक जना चीनबाट फर्किएका हुन्। ती चारै जनालाई आइसोलेसन वार्डमा राखिएर उपचार गराइँदैछ।
भाइरस संक्रमण प्रभावित देशहरु दक्षिण कोरिया र चीनबाट फर्केका नेपालीहरुमा रुघाखोकीका लक्षणहरु देखिएपछि अस्पताल आएका उनीहरुलाई कोरोनाको आशंकामा आइसोलेसन वार्डमा भर्ना गरिएको जनाइएको छ ।
आइतबार दिउँसो दुई जना र बेलुकी थप दुई जना टेकु अस्पताल पुगेका थिए। चीन र कोरियाबाट फर्किएलगत्तै ज्वरो आएपछि उनीहरु स्वास्थ्य परीक्षणका लागि टेकु अस्पताल पुगेका हुन् ।
हालसम्म ती दुई देशबाट आएका २३ जनालाई आइसोलेसन वार्डमा राखिएको छ। उनीहरुको स्वास्थ्य परीक्षणपछि नमुना संकलन गरेर ल्याबमा पठाइएको र आज रिर्पोट आउने अस्पतालले जनाएको छ।
