कालापानीबाट भारतीय सेना हटाउनु पर्ने माग गर्दै संसदमा संकल्प प्रस्ताव

आज (बिहीबार) को प्रतिनिधिसभा बैठकमा कालापानीबाट भारतीय सेना हटाउनु पर्ने मागसहितको संकल्प प्रस्ताव पेश हुने भएको छ ।

सत्तारुढ नेकपाका सांसद खगराज अधिकारीले यो प्रस्ताव पेश गर्ने तयारी रहेको संसद सचिवालयले जानकारी दिएको छ ।

अधिकारीले ‘भारत सरकारले नेपालको दार्चुला जिल्लाको कुटियाङदी र लिम्पियाधुरा क्षेत्र समावेश गरी भारतको नक्सा प्रकाशित गरिसकेपछि सर्वदलीय बैठकबाट नेपालको भू–भाग कसैबाट कुनै प्रकारले हडप्ने काम नहोस् भन्ने अडान कायम गरी नेपाल सरकारलाई निर्देशन गरेकाले कुटनीतिक र अन्य पहलकदमी गरी नेपालको भू–भाग कायम गर्न र कालापानी क्षेत्रमा रहेका विदेशी सेना हटाउन आवश्यक भएकाले’ भन्ने विषयको संकल्प प्रस्ताव प्रस्तुत गर्ने संघीय संसदले जानकारी गराएको छ ।

सांसद रामकुमारी झाँक्रीले सो प्रस्तावको समर्थन गर्ने छिन् । यसअघिकै बैठकमा यो विषय कार्यसूची थियो । तर, समय अभावका कारण आजका लागि सारिएको जनाइएको छ ।

कुटनीतिक र अन्य पहलकदमी गरी अतिक्रमित नेपाली भू–भाग फिर्ता गर्न र कालापानी क्षेत्रमा रहेका विदेशी सेना हटाउन संसदले सरकारको ध्यानाकर्षण गराउने तयारी गरेको हो । राष्ट्रियसभाको बैठक पनि आज दिउँसो १ बजेका लागि बोलाइएको छ ।

यसअघि सांसदहरुले नेपालको तर्फबाट पनि देशको नक्सा तयार गरी सार्वजनिक गर्न माग हुँदै आएको छ । यता सरकारले भने कालापानी क्षेत्रको सीमा विवादको समस्या हल गर्न भारत सरकारलाई पत्रचार गरिसकेको बताउँदै आएको छ ।