- बिहिबार, भदौ ४, २०८३ / Thursday, Aug, 20 ,2026
आमाको हत्यापछि छोराले पनि आत्महत्या गरेका छन्। मोरङको बेलबारी नगरपालिका–४ बुधबारेका ३१ वर्षीय जीवन लिम्बूले ६१ वर्षीया आमा देवीकुमारी लिम्बूको हत्या पछि आफूले पनि आत्महत्या गरेका हुन्।
इलाका प्रहरी कार्यालय बेलबारीका प्रहरी निरीक्षक ऋषिराम ढकालले जीवनले ईट्टा प्रहार गरी बिहीबार बिहान आमाको हत्या गरेको र पछि आफैं चक्कुले घाँटी रेटेर आत्महत्या गरेको जानकारी दिए।
‘सुरुमा आमाको टाउकोमा ईट्टा प्रहार गरेर हत्या गरेछ पछि तरकारी काट्ने चक्कुले घाँटी रेटेर आत्महत्या गरेछ’, ढकालले भने, ‘हत्याको कारण भने खुल्न सकेको छैन।’
घरायसी विवादमा आमाको हत्या भएको हुनसक्ने प्रहरीले अनुमान गरेको छ। प्रहरीले घरभित्र भुइँमा रगत लतपतिएको अवस्थामा बिहान ११ बजे देवीमायाको शव भेटेको जनाएको छ।
घटनास्थलबाट प्रहरीले हत्यामा प्रयोग भएको ईट्टा र जीवनले आत्महत्याका क्रममा प्रयोग गरेको चक्कु फेला पारेको छ। जीवनको बेलबारीकै नोबेल सामुदायिक अस्पतालमा उपचारका क्रममा निधन भएको प्रहरीले जनाएको छ।
अविवाहित जीवन लागुऔषध र मादकपदार्थ सेवनकर्ता रहेको र नशाकै क्रममा आमाको हत्या गरेर आफूले पनि आत्महत्या गरेको हुनसक्ने प्रहरी अनुमान छ।
