- बिहिबार, भदौ ४, २०८३ / Thursday, Aug, 20 ,2026
बाराको देवताल गाउँपालिकामा एकैपटक ठूलो संख्यामा ४६ जना स्थानीय जनप्रतिनिधि, स्वास्थ्यकर्मीमा कोरोना भाइरस पुष्टि भएपछि पूरै पालिका निषेधाज्ञा जारी गरिएको छ ।
७४ वटा नमुना परीक्षण गर्दा ४६ जनामा कोरोना संक्रमण पुष्टि भएपछि जिल्ला प्रशासन कार्यालय बाराले पूरै गाउँपालिकामा आसपासका पालिकाबाट आवागमनसमेत निषेधाज्ञा जारी गरेको हो ।
संक्रमितमध्ये ११ जना महिला र ३५ जना पुरुष छन् । देवताल गाउँपालिकाका ३४ जना, सुवर्ण गाउँपालिकाका ३, कलैया उपमहानगरपालिकाका ३ जना र धनकौलका ६ जनामा कोरोना संक्रमण पुष्टि भएको हो ।
संक्रमित हुनेमा गाउँपालिका अध्यक्षसहित ९ जना जनप्रतिनिधि, १६ जना स्वास्थ्यकर्मी, ६ जना गाउँपालिकाका कर्मचारी, ६ जना स्वास्थ्यकर्मीको परिवारका सदस्य र बाँकी स्थानीय रहेकोे जनाइएको छ ।
देवताल गाउँपालिका कार्यालय र वडा कार्यालयहरूबाट प्रदान गरिँदै आएको सेवा बन्द गरिएको छ । अत्यावश्यक खाद्यान्न औषधि, ग्यास, दूध, तेलबाहेक सम्पूर्ण पसल, तथा हाटबजार बन्द भएको छ ।
अत्यावश्यक काममा बाहेक नागरिकलाई घर बाहिर निस्कन सवारी बाहेक मोटरसाइकल समेत सञ्चालनमा प्रतिबन्ध र अन्तर आसपासका पालिकाबाट आवागमन निषेध गरिएका छ भने धार्मिक साँस्कृतिक, सामाजिक कार्य सम्पूर्णमा प्रशासनले रोक लगाएको छ ।
