प्रहरीमा कोरोनाको संक्रमण बढ्दै, संक्रमित प्रहरीको संख्या १६२९ पुग्यो

विश्वव्यापी महामारीको रुप लिएको कोरोना भाइरस संक्रमणको जोखिम कम गर्न अग्रपंतिमा खटिएको नेपाल प्रहरीका कर्मचारी भाइरसबाट संक्रमण हुने क्रम बढ्दै गएको छ ।

भाइरस संक्रमणको जोखिम न्यूनिकरणका लागि सरकारले जारी गरेको निषेधाज्ञा लगायतको कार्यान्वयनमा खटिएका सुरक्षाकर्मीहरु आफैं संक्रमित हुने क्रम बढेको हो ।

प्रहरी प्रधान कार्यालयका अनुसार सोमबार बिहानसम्म देशभर गरी १ हजार ६ सय २९ प्रहरी कर्मचारीलाई कोरोना भाइरसको संक्रमण देखिएको छ । जसमध्ये २ जना नायव महानिरीक्षक (डीआईजी) समेत छन् । प्रहरीको प्राविधिक तर्फका (चिकित्सक) डीआईजीसहित १ हजार ६ सय २९ जना कोरोना भाइरसबाट संक्रमित छन् ।

संक्रमण देखिएका प्रहरी कर्मचारीमध्ये प्रहरी प्रधान कार्यालयका मात्रै ९७ जना छन् । यस्तै, काठमाडौं उपत्यकामा कार्यरत ३ सय २२ जना प्रहरी कर्मचारीमा कोरोना भाइरसको संक्रमण देखिएको छ ।

नेपाल प्रहरीका केन्द्रीय प्रवक्ता एसएसपी कुवेर कडायतका अनुसार काठमाडौं उपत्यका पछि प्रदेश नम्बर १ मा सबैभन्दा बढी प्रहरी कर्मचारीमा कोरोना भाइरसको संक्रमण देखिएको छ ।

प्रदेश नम्बर १ मा २ सय ८ जना प्रहरी कर्मचारीमा कोरोना भाइरसको संक्रमण देखिएको छ । यस्तै, प्रदेश नम्बर २ मा १ सय २० र काठमाडौं उपत्यका बाहेक बागमती प्रदेशमाा ४३ जना प्रहरी कर्मचारीमा कोरोना भाइरसको संक्रमण देखिएको छ ।

गण्डकी प्रदेशमा ६०, प्रदेश नम्बर ५ मा ५३, कर्णाली प्रदेशमा १५ र सुदूरपश्चिम प्रदेशमा १८ जना प्रहरी कर्मचारीमा कोरोना भाइरसको संक्रमण देखिएको छ ।

हालसम्म कोरोना संक्रमण देखिएका प्रहरी कर्मचारीमध्ये ६ सय ९३ जना संक्रमण मुक्त भएका छन् । अझै ८ सय ९३ जना सक्रिय संक्रमित छन् ।