- बिहिबार, भदौ ४, २०८३ / Thursday, Aug, 20 ,2026
सत्तारुढ नेकपाका बहुमत सदस्यहरुसँगको छलफल अघि नेकपाका अध्यक्ष पुष्पकमल दाहाल प्रधानमन्त्री केपी शर्मा ओलीलाई भेट्न बालुवाटार पुगेका छन्।
दाहालले अपरान्ह ४ बजे पार्टी सचिवालयका सदस्यहरुसँग छलफल गर्दै छन्। पार्टीभित्र देखिएको विवाद समाधान हुन नसकिरहेका बेला दाहालले प्रधानमन्त्री ओलीसँग छलफल गर्न लागेका हुन् ।
यसअघि ओली प्रचण्डबीच गत आइतवार भेटघाट भएको थियो । प्रचण्डले पार्टीभित्र देखिएको समस्या समाधानका लागि सचिवालय बैठक बोलाउन दवाव दिइरहेका छन् । भने ओली बिना एजेण्डा सचिवालय बैठक नबोलाउने अडानमा रहेका छन् ।
सोमबारसम्म सचिवालय बैठक राख्ने विषयमा सहमतिका लागि प्रधानमन्त्री ओलीलाई आग्रह गरे पनि उनी सकारात्मक नदेखिएपछि आज अपरान्ह सचिवालयका सदस्यबीच फेरि छलफल हुन लागेको स्रोतले जनाएको छ ।
दाहाल लगायतका नेताहरुले औपचारिक बैठक राख्ने तयारी गरिरहेका बेला मंगलबार बिहान ओलीले लुम्बिनी प्रदेशका मुख्यमन्त्री एवम् स्थायी कमिटी सदस्य शंकर पोखरेललाई खुमलटार पठाएका थिए । त्यसअघि सोमबार महासचिव विष्णु पौडेलले पनि दाहालसँग छलफल गरेका थिए ।
आज बिहान खुमलटार पुगेर पोखरेलले अध्यक्ष दाहाललाई एक पटक प्रधानमन्त्रीसँग भेटवार्ता गर्न आग्रह गरेका थिए ।
