घुन्सा पुगेर ओलीले भने, देशको प्रगति हुन्छ भनेर आत्तिएकाहरूले मात्र मेरो राजीनामा मागे

प्रधानमन्त्री केपी ओलीले आफू नेतृत्वको वर्तमान सरकार कुनै पनि हालतमा परिवर्तन नहुने बताएका छन् ।

पाँचथरको फाक्तुङ गाउँपालिका-६ घुन्सामा स्थापित सामुदायिक स्वास्थ्य इकाई भवनको उद्घाटन गर्दै सरकारविरुद्ध भइरहेका भ्रमपूर्ण प्रचारको पछि नलाग्न आग्रह समेत गरेका छन् । प्रधानमन्त्रीले सरकारलाई काम गरेन भन्नेहरू काम नपाएका र अस्थिरता चाहनेहरूको झुन्ड भएको समेत दाबी गरे ।

प्रधानमन्त्री ओलीले लोकप्रिय काम गर्ने सरकार रह्यो भने आफ्नो अस्तित्व समाप्त हुन्छ भन्ने पीरले कहिले पार्टी नेतृत्व छाड्न र कहिले सरकारबाटै राजीनामा मागिँदै आएको बताए ।

‘देशको प्रगति हुन्छ भनेर आत्तिएकाहरूले मात्र मेरो राजीनामा मागेका हुन् । गुमेको जमिन फिर्ता गनेर्देखि अरु विकास र समृद्धिका काम गरेको देखिनसहनेको यसमा हात छ, ’ प्रधानमन्त्रीले ओली भने ।

ओलीले छिमेकी मुलुकसँगको सम्बन्धलाई सुदृढ गर्ने नीति  लिएको भन्दै भारतद्वारा मिचिएको भूमि फिर्ता लिन गरेको प्रयास, भारत र चीन दुवैसँगको सम्बन्धलाई अझ सुधार, बन्द नाका खोल्नेजस्ता कार्यले वर्तमान सरकार सफल हुँदै गएको दावी गरे ।

कार्यक्रममा संस्कृति, पर्यटन तथा नागरिक उड्डयनमन्त्री योगेशकुमार भट्टराई, प्रदेश नं १ का मुख्यमन्त्री शेरधन राई, नेपाल कम्युनिस्ट पार्टी(नेकपा)का नेता सुवास नेम्वाङलगायतको उपस्थिति रहेको थियो ।