- बिहिबार, भदौ ४, २०८३ / Thursday, Aug, 20 ,2026
अख्तियार दुरुपयोग अनुसन्धान आयोगले घुस लिएको आरोपमा नुवाकोटको बेलकोटगढी नगरपालिकामा कार्यरत इन्जिनियर (करार) पर्वत पौडेलविरुद्ध विशेष अदालत काठमाडौंमा मुद्दा दायर गरेको छ ।
अदुवाबारी खानेपानी योजनाको अन्तिम बजेट निकासा र निर्माण सम्पन्न घरको घर निर्माण स्थायी इजाजत पत्र दिएबापत ७५ हजार रुपैयाँ घुस लिएको आरोपमा उनीविरुद्ध अख्तियारले बुधबार मुद्दा दायर गरेको हो ।
आयोगका प्रवक्ता तारानाथ अधिकारीका अनुसार इन्जिनियर पौडेलले उक्त रकम होटल व्यवसायी नारायणप्रसाद भट्टमार्फत लिन लगाएको अवस्थामा अख्तियार दुरुपयोग अनुसन्धान आयोग टंगालबाट खटिएको टोलीले दुवै जनालाई पक्राउ गरेको थियो ।
अनुसन्धानको क्रममा इन्जिनियर पौडेलले उक्त रकम घुस लिएको तथ्य पुष्टि हुन आएकोले उनीविरुद्ध मुद्दा दायर गरिएको प्रवक्ता अधिकारीले बताए ।
