- बिहिबार, भदौ ४, २०८३ / Thursday, Aug, 20 ,2026
नेपाल कम्युनिष्ट पार्टी (नेकपा, दाहाल–नेपाल समूह) का अध्यक्षद्वय पुष्पकमल दाहाल प्रचण्ड र माधवकुमार नेपालले नेपाली कांग्रेसका सभापति शेरबहादुर देउवासँग छलफल गरेर फर्किएका छन् ।
उनीहरु देउवासँगको छलफलका लागि देउवा निवास बुढानिलकण्ठ नै पुगेका हुन् । प्रचण्ड, नेपाल र देउवाबिच करिब आधा घण्टा छलफल भएको छ ।
प्रधानमन्त्रीको सिफारिसमा राष्ट्रपतिबाट पुस ५ गते भएको संसद विघटन असंवैधानिक ठहर गर्दै मंगलबार सर्वोच्च अदालतले सो विघटन बदरको घोषणा गरेपछिको अवस्थाबारे उनीहरुबिच छलफल भएको हो ।
प्रधानमन्त्री केपी शर्मा ओलीलाई राजीनामा दिन दबाब परिरहेको र राजीनामा नदिएमा अविश्वासको प्रस्ताव मार्फत हटाउने रणनीतिमा रहेका प्रचण्ड–नेपाल भावी राजनीतिक समिकरणका लागि कांग्रेसको साथको खोजीमा छन् ।
सर्वोच्चको फैसलालगत्तै हिजो नै देउवा र अध्यक्ष दाहालबीच टेलिफोन वार्ता भएको थियो । टेलिफोन वार्तामा देउवा र दाहालले आज भेटेर छलफल गर्ने निधो गरेका थिए ।
