- मङ्लबार, कार्तिक २५, २०८३ / Tuesday, Nov, 10 ,2026
बन्धक बनाएर यौन धन्दा चलाएको आरोपमा झापाबाट दुई जना महिला पक्राउ परेका छन्।
मोरङ पथरीशनिश्चरे नगरपालिका–३ की ३८ वर्षीया उर्मिला नेम्बाङ र इलामको चुलाचुली गाउँपालिका–४ की ३८ वर्षीया बन्ठी भन्ने नन्दिता साँवा लिम्बुलाई जिल्ला प्रहरी कार्यालय झापाको टोलीले पक्राउ गरेको हो।
सोही स्थानबाट १७ देखी ३९ वर्ष उमेर समूहका आठजना युवतीलाई उद्धारसमेत गरिएको प्रहरी कार्यालय झापाका डीएसपी राकेश थापाले जानकारी दिए।
उनीहरूले दमक नगरपालिका–६ स्थित नयाँ सब्जिमन्डीमा घर भाडामा लिएर युवतीहरूलाई बन्धक बनाएर यौन धन्दा चलाउँदै आएको प्रहरीको भनाइ छ। उक्त घर नेम्बाङको हो।
पीडित महिलाहरूले आफूहरू कामको खोजीमा दमक आएको र काम दिन्छु भन्दै बन्धक बनाएर यौन शोषण गर्ने गरेको बताएका छन्। उद्धार गरिएका युवती तथा महिलाहरूलाई झापा जिल्ला अदालत भद्रपुरमा पेस गरी आफन्तजनको जिम्मा लगाइएको छ।
पक्राउ परेका नेम्बाङ र लिम्बुलाई मानव बेचबिखनसम्बन्धी मुद्दा दर्ता गरी अदालतबाट म्याद थपेर आवश्यक कानुनी प्रक्रिया अघि बढाइएको डीएसपी थापाले जानकारी दिए।
