- बिहिबार, भदौ ४, २०८३ / Thursday, Aug, 20 ,2026
नेपाली कांग्रेसको पदाधिकारी बैठक सानेपास्थित पार्टी कार्यालयमा सुरु भएको छ।
सभापति शेरबहादुर देउवाले पार्टीका पूर्व पदाधिकारी तथा प्रभावशाली नेताहरूसमेत सहभागी हुने गरी बैठक बोलाएका थिए।
बैठक सुरु भइसके पनि देउवा भने आइपुगेका छैनन्। पार्टीका वरिष्ठ नेता रामचन्द्र पौडेल पनि बैठकमा सहभागी छैनन्।
देउवा कार्यव्यस्तताका कारण उपस्थित नभएको बताइएको छ। वरिष्ठ नेता पौडेल भने उपत्यका बाहिर भएका कारण बैठकमा सहभागी हुन नसकेका हुन्।
बैठकमा उपसभापतिद्वय विमलेन्द्र निधि र विजयकुमार गच्छदार, महामन्त्रीद्वय पूर्णबहादुर खड्का र शशांक कोइराला, सहमहामन्त्री प्रकाशशरण महत, कोषाध्यक्ष सीतादेवी यादव, पूर्व महामन्त्री प्रकाशमान सिंह र कृष्णप्रसाद सिटौला, नेताहरु रामशरण महत, अर्जुननरसिंह केसी, मीनेन्द्र रिजाल, विश्वप्रकाश शर्मालगायत सहभागी छन्।
भोलि सोमबार बस्ने केन्द्रीय कार्यसमिति बैठकका लागि एजेण्डा तय गर्न सभपाति देउवाले बैठक बोलाएका हुन्। आजको बैठकमा नयाँ सरकार गठनको विषयमा छलफल हुनेछ।
साथै बैठकले माओवादी केन्द्र र जसपासँग सत्ता समीकरणका लागि भइरहेको छलफलको समीक्षा तथा थप रणनीति तय गर्ने जनाइएको छ।
बैठकमा १४औं महाधिवेसनलाई केन्द्रबीन्दुमा राखेर नेताहरूबीच छलफल हुनेछ।
