- सोमवार, कार्तिक २४, २०८३ / Monday, Nov, 09 ,2026
कर्णाली नदीमा डुंगा पल्टिँदा पश्चिम सुर्खेतकी एक युवती बेपत्ता भएकी छन्।
कैलालीको मोहन्याल गाउँपालिकातर्फ जाने क्रममा आज बिहान डुंगा पल्टिँदा चौकुने गाउँपालिका– १० घाटगाउँकी १८ वर्षीया अनिता नेपाली बेपत्ता भएको जिल्ला प्रहरी कार्यालय सुर्खेतले जनाएको छ।
सुर्खेतको चौकुने गाउँपालिका– १० र कैलालीको मोहन्याल गाउँपालिका– ३ को सिमानामा पर्ने कर्णाली नदीमा डुंगा पल्टिएको हो। जिल्ला प्रहरी कार्यालयका प्रवक्ता प्रहरी नायब उपरीक्षक रामप्रसाद घर्तीले डुंगामा सवार छ जनामध्ये पाँच जना पौडिएर ज्यान जोगाउन सफल भएका बताए।
डुङ्गामा एक पुरुष र पाँच महिला यात्रु सवार थिए। दसैँमा घर लिपपोतका लागि कमेरो र रातो माटो लिन उनीहरु मोहन्याल गाउँपालिकामा पर्ने सोल्टा भन्ने स्थानतर्फ लागेको बताइएको छ।
