- बिहिबार, भदौ ४, २०८३ / Thursday, Aug, 20 ,2026
नेकपा एकीकृत समाजवादीका अध्यक्ष माधवकुमार नेपालले तीन तहकै चुनाव एकै पटक हुनुपर्ने बताएका छन्।
पोखरामा शुक्रबार पत्रकारसँग कुरा गर्दै पूर्वप्रधानमन्त्रीसमेत रहेका नेपालले सबै निर्वाचन एकै पटक गर्न प्रस्ताव गरेका हुन् । खर्च कम गर्न पनि तीनवटै निर्वाचन एकै पटक गर्न उपर्युक्त हुने उनको भनाइ थियो । तर आफ्नो पार्टी अर्ली इलेक्सनको पक्षमा भने नरहेको उनले प्रष्ट पारे ।
अध्यक्ष नेपालले तत्काल कुनैपनि पार्टीसँग एकीकरण नगर्ने तर चुनावसम्म पाँच दलीय गठबन्धन कायम रहने बताए । उनले एमालेमा बस्नेहरुको कुनै भविष्य नभएको दाबी समेत गरे ।
एमाले पार्टी पनि अध्यक्ष केपी ओलीसँगै सति जाने उनको भनाइ छ ।
नेपालले प्रधानन्यायाधीश र न्यायालयमाथि केपी ओलीले नै हिलो छ्याप्ने काम गरेको भन्दै महाभियोग लाउने कुरा सम्भव नभएको बताए । ‘सर्वोच्च अदालतका न्यायाधीशले ५ पुसमा संविधान मिचेर प्रतिनिधिसभा भंग गर्ने प्रधानमन्त्रीविरुद्ध उभिएर जुन फैसला गर्नुभयो, त्यसको प्रसंशा दुनियाँले गरेको छ । त्यसपछि जेठ ७ गते उही प्रधानमन्त्रीले दुष्साहस गर्नुभयो । त्यसविरुद्ध पनि उहाँहरु उभिनुभयो,’ उनले भने ।
प्रधानन्यायाधीशको विरोध गर्ने केपी ओली मात्रै भएको बताउदै उनले तिकडम गरेर सबैको राजीनामा माग्ने गलत काम भएको जिकिर गरे ।
