- बिहिबार, भदौ ४, २०८३ / Thursday, Aug, 20 ,2026
नेत्रविक्रम चन्द विप्लव नेतृत्वको नेपाल कम्युनिष्ट पार्टीले आह्वान गरेको नेपाल बन्दको प्रभाव देशका विभिन्न ठाउँमा आशिंक प्रभाव परेको छ ।
बन्दका कारण काठमाडौंसहित देशका प्रमुख शहरमा मंगलबार बिहान सवारी साधान न्यून संख्यामा मात्र चलेका छन् । बन्दका कारण यात्रुहरुले भने सास्ती पाएका छन् । विभिन्न स्थानमा यात्रु गाडी कुरिरहेका देखिन्छन् । तर गाडी नपाउँदा उनीहरु अलपत्र छन् ।
विद्यालयहरु पनि अधिकांश बन्द गरिएका छन् ।
बन्दको प्रभाव लुम्बिनी प्रदेशका जिल्लामा बिहानैदेखि परेको छ ।
पेट्रोलियम पदार्थमा भएको मूल्यवृद्धिको विरोधमा विप्लव नेतृत्वको नेकपाले बन्दको आह्वान गरेको हो । बन्दका कारण लुम्बिनी प्रदेशका रुपन्देही, दाङ, बाँके, पाल्पा, गुल्मी, अर्घाखाँची, नवलपरासी, कपिलवस्तुलगायतका जिल्लाको जनजीवन प्रभावित बनेको हो ।
बन्दले लामो तथा छोटो दूरीका सवारीसाधन सञ्चालन भएका छैनन् भने बजार, उद्योगधन्दा, कलकारखाना पनि ठप्प छन् । सहरका केही भित्री भागमा भने पसल फाटफुट खुलेका छन् । कतिपय जिल्लामा सीमित मात्रामा मोटरसाइकल चलेका छन् ।
बुटवलमा भने केही स्थानमा मात्र आन्दोलनकारी देखिएका छन् । ठाउँठाउँमा सुरक्षाकर्मीको पनि बाक्लो उपस्थिति छ ।
यता गण्डकी प्रदेशको तनहूँबाट बन्दको आह्वान गर्दै हिंडेका ११ जनालाई प्रहरीले नियन्त्रणमा लिएको छ ।
