- बिहिबार, भदौ ४, २०८३ / Thursday, Aug, 20 ,2026
संसदको शिक्षा तथा स्वास्थ्य समितिले आवश्यक परे नागरिकलाई घरघरमै गएर कोभिड-१९ विरुद्धको खोप लगाइदिन सरकारलाई अनुरोध गरेको छ ।
मंगलबार बसेको समिति बैठकपछि निर्णय सुनाउँदै समिति सभापति जयपुरी घर्तीले कोरोना खोप सबैलाई लगाउनुपर्ने र आवश्यक परे नागरिकहरुलाई घरघरमै गएर लगाउन अनुरोध गरेकी हुन् ।
अपाङ्गता, असाहाय, वृद्धवृद्धा र गर्भवतीलाई भने अनिवार्य रुपमै घरघरमै गएर कोरोना खोप लगाइदिने व्यवस्थाका लागि सभापति घर्तीले निर्देशन जारी गरेकी छन् ।
समितिको निर्देशन अघि समितिको बैठकमा सांसदहरुले गाउँ गाउँमा टोली खटाएर कोरोना खोप लगाइनुपर्ने, अपाङ्गता, असाहाय, वृद्धवृद्धा र गर्भवतीलाई घरमै पुगेर खोप लगाइनुपर्ने बताएका थिए ।
जवाफमा स्वास्थ्य तथा जनसंख्या मन्त्रालयका सचिव रोशन पोखरेलले गाउँ गाउँमा टोली खटाएर कोरोना खोप लगाउने कार्य जारी रहेको बताएका थिए । तर, घर घर जान सम्भव नरहेको भन्दै तोकिएको केन्द्रसम्म पुग्नुपर्ने बताएका थिए ।
