- बिहिबार, भदौ ४, २०८३ / Thursday, Aug, 20 ,2026
राष्ट्रिय सभा सदस्यको भोलि हुने चुनावको सबै तयारी पूरा भएको निर्वाचन आयोगले जनाएको छ ।
आयोगका अनुसार मतदानका लागि सातवटै प्रदेशमा रहेका मतदान केन्द्रमा आवश्यक सबै तयारी पूरा भएको छ । राष्ट्रिय सभामा फागुन २० गतेदेखि रिक्त हुने १९ पदका लागि भोलि बिहान ९ बजेदेखि दिउँसो ३ बजेसम्म मतदान हुँदै छ ।
आयोगले मतदानका लागि आठवटा मतदानस्थल र १४ वटा मतदान केन्द्र तोकेको छ। माघ ७ गते नै सबै प्रदेशको निर्वाचन अधिकृतको कार्यालयमा मतपत्र पठाइसकेको आयोगले जनाएको छ ।
सातै प्रदेशमा दुई हजार २५ मतदाता छन्। जसमा पाँच सय ३२ प्रदेश सभा सदस्य र एक हजार चार सय ९३ जना स्थानीय तहका प्रमुख तथा उपप्रमुखले मतदान गर्नेछन् ।
राष्ट्रिय सभाका १९ पदका लागि ४३ जनाको उम्मेदवारी परेको छ। सत्तारुढ गठबन्धनले मिलेर उम्मेदवार दिएको छ भने एमालेले एक्लै उम्मेदवार उठाएको छ ।
कोरोना भाइरसको महामारीको जोखिम उच्च रहेकाले मतदानस्थलमा जनस्वास्थ्यका मापदण्ड पालनामा कडाइ गरिएको आयोगले जनाएको छ ।
