- बिहिबार, भदौ ४, २०८३ / Thursday, Aug, 20 ,2026
अख्तियर दुरूपयोग अनुसन्धान आयोगले सरकारी कागजात सच्याई गैरकानूनी रुपमा भ्रष्टाचार गरेको आरोपमा यातायात व्यवस्था कार्यालय, सवारी चालक अनुमति-पत्र, एकान्तकुनाका तत्कालीन कार्यालय प्रमुखसहित १७ जनाविरूद्ध मुद्दा दायर गरेको छ ।
आयोगले आज काठमाडौं विशेष अदालमा उनीहरुविरुद्ध मुद्दा दायर गरेको हो । भ्रष्टचारको आरोपमा मुद्दा दायर हुनेहरुमा तत्कालीन कार्यालय प्रमुखहरु सम्बर बहादुर कार्की र राजुभाई कुस्मा, मेकानिकल इन्जिनियर विजय राज गिरीसमेत १२ जना कर्मचारी र ५ जना विचौलियाहरु रहेको अख्तियारले जनाएको छ ।
यातायात व्यवस्था कार्यालय ललितपुरका कर्मचारीहरुले गैरकानूनी रुपमा सवारी चालक अनुमति पत्र जारी गर्ने गरेको भन्ने समाचार सञ्चार माध्यममा प्रकाशित भएको थियो । सोही समाचारमा आधारित उजुरी निवेदनका क्रममा अनुसन्धान गर्दा उनीहरुले सवारी चालक अनुमति-पत्रको नवीकरण गर्ने सम्बन्धमा गलत नियतले मातहतका कर्मचारीहरुलाई अख्तियारी प्रदान गरेको खुलेको अख्तियारले विज्ञप्तिमार्फत जनाएको छ ।
अख्तियरले भ्रष्टाचार निवारण ऐन, २०५९ को दफा ११ बमोजिमको कसुर गरेकोले सोही ऐनअनुसार उनीहरूविरूद्ध सजायका लागि मागदाबीसहित आरोपपत्र दायर गरेको हो।
