- बिहिबार, भदौ ४, २०८३ / Thursday, Aug, 20 ,2026
बाल यौन दुराचारको अभियोग लागेका सर्वनाम शिक्षालयका शिक्षक तथा होस्टल वार्डेन रामजी बस्नेतलाई काठमाडौं जिल्ला अदालतले जेल चलान गरेको छ।
गोकर्णेश्वर नगरपालिका–६ शान्ति टोलमा रहेको शिक्षालयका बार्डेन बस्नेत माथि योन दुराचारको आरोप लागेको थियो । बिहिबार थुनछेक बहसपछि जिल्ला न्यायाधीश केदारनाथ पौडेलको एकल इजलासले उनलाई धरौटीमा रिहा गर्न अस्वीकार गर्दै पुर्पक्षका लागि थुनामा पठाउने आदेश दिएको हो।
पीडित बालिकाहरुको पीडकबाट सुरक्षित हुन पाउने अधिकार समेतलाई दृष्टिगत गरी अदालतले पुर्पक्षका लागि थुनामा पठाउने आदेश गरेको हो। होस्टल वार्डेनका रुपमा खटिएका उनी आरोप लागेपछि फरार भएका थिए। प्रहरीले उनलाई जेठ २२ गते रामेछापबाट पक्राउ गरेको थियो।
सर्बनाम शिक्षालयमा कक्षा १० मा अध्यनरत १५ वर्षीया किशोरी, कक्षा ७ मा पढ्ने १२ वर्षीया र कक्षा ८ मा अध्यनरत १३ वर्षीया बालिकालाई दुर्व्यवहार गरेको अभियोगमा उनलाई पक्राउ गरिएको थियो।
सुरुमा होस्टलका वार्डेन रामेछाप घर भएका ३५ वर्षीय रामजी बस्नेतलाई पक्राउ गरिएको थियो। सोधपुछ तथा थप अनुसन्धानका लागि सोही शिक्षालयका प्रिन्सिपलसमेत थप २ जनालाई पनि नियन्त्रणमा लिइएको थियो।
