बालेनको कटाक्ष- ‘मिडिया काठमाडौंमै अल्झिए, डोटीमा भूकम्पले ३८ सय घर भत्काउँदा समाचार बन्दैन’

काठमाडौं महानगरपालिकाका मेयर बालेन शाहले आफूले गर्न थालेका सुधारका काममा मिडियाले आलोचना गरेकोमा कटाक्ष गरेका छन् । डोटीका भूकम्प पीडितलाई राहत रकम हस्तान्तरण गर्दै बालेनले राष्ट्रिय मिडियाले काठमाडौंमै केन्द्रित भएर समाचार लेखेको भन्दै कटाक्ष गरेका हुन् । उनले आफूले अनधिकृत संरचना हटाउँदा मिडियाले गरेको आलोचनाबारे घुमाउरो ढंगले विरोध पनि गरेका छन् ।

उनले फेसबुकमा लेखेका छन्, ‘नेपालका दुरदराजमा नागरिकहरुले दुख पाइरहदा काठमाण्डौमा चासो नै नहुने, समाचार नै नबन्ने अवस्था आज पनि छ । काठमाण्डौमा अनाधिकृत टहरा भत्काउँदा राष्ट्रिय समाचार बन्छ तर डोटीमा भुकम्पबाट ३८ सय टहरा भत्किदा समाचार बन्ने बिषय सम्म मानिदैन । डोटीमा कार्तिक २३ मा आएको ६.६ रेक्टर स्केलको भुकम्पले ३८ सय घरटहरा भत्काएको स्थानीय गाउँपालिकाको तथ्यांक छ । परालको टहरा बनाएर बसेको स्थानमा चितुवा आक्रमणमा मान्छे घाइते भएको छ । चितुवाको डर छदैछ, त्यसमाथि पुष महिना सुरु भइसक्यो । जाडो बढेको छ, अब हिउँ पर्न सुरु हुन्छ । जाडो र हिउँको कारणले ज्यान गुमाउन सक्ने अवस्था बन्न बेर लाग्दैन । ति पिडितहरु कसरी सुरक्षित होलान् भन्ने सार्वजनिक रुपमा चासोसम्म देखिदैन । पिडितहरुको पिडामा अरुको चिन्ता छ भन्ने अनुभुतिले मात्रै पनि उनीहरुको मनोबल बढ्नेछ । डोटीका भुकम्प पिडितका लागि सहयोगको अनुरोध काठमाण्डौ महानगरमा पनि आएको थियो । महानगरबाट विपद व्यवस्थापन अन्तर्गतको बजेटबाट १० लाख रुपैयाँ सहयोग गाउँपालिकालाई गरेका थियौँ । यो भन्दा धेरै गर्न हाम्रा आफ्नै सिमाहरु छन् । यसैले राज्य संयन्त्र, संबंधित मन्त्रालय , सांसदज्यु हरु ,सरकारी गैरसरकारी संघसंस्था तथा व्यक्तिपहलमा पनि पिडितहरुलाई सहयोग गर्न अनुरोध गर्दछौँ ।’