- बिहिबार, भदौ ४, २०८३ / Thursday, Aug, 20 ,2026
राष्ट्रिय प्रजातन्त्र पार्टीका अध्यक्ष कमल थापाले चुनावको तयारीमा लाग्न नेता, कार्यकर्तालाई निर्देशन दिएका छन् ।
सोमबार मकवानपुरको हेटौंडामा आयोजित कार्यक्रममा बोल्दै थापाले सर्वोच्च अदालतले प्रतिनिधिसभा विघटनको निर्णय सदर गरे तत्काल चुनावमा जानसक्ने गरी तयारी थाल्न आग्रह गरेका हुन् ।
अध्यक्ष थापाले संगठन सुदृढीकरण, जनसंघर्ष र महाधिवेशनको तयारीलाई सशक्त ढंगबाट सञ्चालन गर्नुपर्नेमा जोड दिए ।
नेपाली समाज सनातन मूल्यमान्यता, धर्म र संस्कृतिको जगमा खडा भएको भन्दै थापाले मुलुकको स्वाधिनता जोगाउन राजासहितको प्रजातन्त्र आवश्यक रहेको बताए ।
उनले अभिभावक नभएपछि मुलुकमा भ्रष्टाचार र मनपरितन्त्र बढेको उल्लेख गरे । थापाले भ्रष्टाचारका साथै बेरोजगारी, धर्मपरिवर्तन र सर्वसत्तावाद अहिलेको प्रमुख समस्या भएको बताएका छन् ।
कार्यक्रममा राप्रपा नेता राजाराम बर्तौला, रामहरि न्यौपाने, गुरुप्रसाद सापकोटा, इन्दिरा न्यौपाने, मीठेबहादुर कार्की लगायतले बोलेका थिए ।
