- बिहिबार, भदौ ४, २०८३ / Thursday, Aug, 20 ,2026
नेकपा (एमाले) का अध्यक्ष तथा प्रधानमन्त्री केपी ओलीले आयोजना गरेको चियापानमा माधव नेपाल–झलनाथ खनाल समूहका पनि केही सांसद सहभागी भएका छन् ।
उक्त समूहले ओलीको चियापान बहिस्कार गर्ने निर्णय गरे पनि सांसदहरु माया न्यौपाने, विष्णु शर्मा र समिना हुसेन सहभागी भएको बालुवाटार स्रोतले बताएको छ ।
ओलीले आज पार्टीका केन्द्रीय सदस्य तथा सांसदहरूलाई चियापानका लागि बालुवाटारमा बोलाएका थिए । फागुन २३ गते सर्वोच्च अदालतले पार्टी पूर्ववत् रुपमा नै फर्काइदिएपछि ओलीले चियापान आयोजना गरेका हुन् ।
ओलीले चैत ७ गते केन्द्रीय कमिटी बैठक पनि बोलाएका छन् । केन्द्रीय कमिटी बैठकमा पनि नजाने निर्णय असन्तुष्ट समूहले गरेको छ ।
सर्वोच्च अदालतको फैसलापछि पहिलोपटक हिजो सोमबार पार्टी कार्यालय धुम्बाराहीमा नेताहरूबीच वार्ता भएको थियो । तर, सहमति भने हुन सकेन ।
एमालेको माधव-झलनाथ पक्षले भोलि र पर्सि राष्ट्रिय कार्यकर्ता भेलाको आयोजना गरेको छ ।
पार्टी एकता अभियान चलाइरहेका उपाध्यक्ष वामदेव गौतमले पनि आफू निकट नेता कार्यकर्ताको भेला आयोजना गरेका छन् ।
