- बिहिबार, भदौ ४, २०८३ / Thursday, Aug, 20 ,2026
नयाँ सरकार गठनको लागि राष्ट्रपति विद्यादेवी भण्डारीले दलहरुलाई दिएको समय सिमा आज सकिदै छ ।
दुई वा दुई भन्दा बढी दल मिलेर बहुमतको सरकार गठनको लागि राजनीतिक दलहरुबीच नयाँ गठबन्धन अझै बन्न सकेको छैन । वर्तमान राजनीतिक अवस्थाको निर्णयक देखिएका जनता समाजवादी पार्टी (जसपा) र सत्तारुढ दलकै असन्तुष्ट झलनाथ खनाल-माधव कुमार नेपाल पक्षको ठोस निर्णय नभएकाले नयाँ सरकारको नेतृत्व लिन तयार रहेको नेपाली कांग्रेस अप्ठ्यारोमा परेको छ ।
कांग्रेसलाई समर्थन गर्न माओवादी केन्द्रमा कुनै विवाद नरहेपनि जसपा भित्र महन्थ ठाकुर र राजेन्द्र महतो पक्ष ओली पक्षमा छन् भने उपेन्द्र यादव ओली सरकारको विपक्षमा । त्यस्तै झलनाथ-माधव पक्षका सांसदहरुले सामुहिक राजीनामा दिएर कांग्रेसलाई सरकार बनाउँन सहयोग गर्ने बताए पनि सबै सांसद् एकमत नहुँदा यसको असर नयाँ सरकार गठनमा परेको छ ।
सामूहिक राजीनामाको चेतावनी दिँदै आएको खनाल नेपाल समूहका २८ सांसद सोमबार ओलीले विश्वासको मत लिँदा संसदमा अनुपस्थित थिए । उनीहरूले राजीनामा दिए नयाँ सरकार बन्न सक्ने भएपछि विपक्षी गठबन्ध जसपा र खनाल-नेपाल पक्षको निर्णयको प्रतिक्षामा रहेको छ ।
गठबन्धनको सरकार बनाउने चाहिने १३६ संख्या पुग्न कांग्रेसका ६१, माओवादी केन्द्रका ४९ र जसपा ३२ मध्ये कम्तीमा २६ सांसदको साथ चाहिन्छ । जसपा भित्र एकमत नहुँदा एमालेको खनाल- नेपाल समुहले राजीनामा दिएमात्र कांग्रेसको नेतृत्वमा सरकार बन्छ ।
यता झलनाथ- माधव पक्षलाई सामुहिक राजीनामा दिनबाट रोख्न भन्दै संस्थापन पक्ष ओलीका केही निकटतम नेताहरु माधव पक्षसंग निरन्तर छलफलमा छन् । तर सहमतिको ठोस निष्कर्ष निस्कन सकेको छैन् । आजै ओलीले स्थायी कमिटी बैठक डाकेका छन् ।
आजसम्म सरकार बनाउन चाहिने १३६ सांसद पुर्याउन दलहरु नसक्दा संसदको ठूलो दलको हैसियतमा धारा ७६ (३) अनुसार ओली नेतृत्वको सरकारले नै निरन्तरता पाउँने संभावना रहेको छ ।
