आजदेखि १२ वर्षमाथिका दीर्घ रोगीलाई फाइजर खोप

सरकारले आजदेखि दीर्घरोगीलाई कोरोना भाइरसविरुद्धको फाइजर खोप दिने भएको छ।

स्वास्थ्य तथा जनसंख्या मन्त्रालयका अनुसार आजदेखि १२ वर्ष माथिका दीर्घ रोगीलाई फाइजर खोप दिइनेछ । यो अभियान मंसिर ४ गतेसम्म चल्ने स्वास्थ्य मन्त्रालयले जनाएको छ ।

दीर्घ रोगीलाई खोप लगाउन देशभर गरी २४ वटा खोप केन्द्र तोकिएको छ । तोकिएका केन्द्रमा खोप बिहान १० देखि दिउँसो ४ बजेसम्म खोप लगाइनेछ ।

१२ वर्षमाथिका लामो समयदेखि मुटुका बिरामी भइ अप्रेसन गरेका वा औषधि प्रयोग गरिरहेका व्यक्ति, मिर्गौलाको समस्या भइ मिर्गौला फेरेका, डायलाइसिस गराइरहेका, औषधि सेवन गरिरहेका बिरामीलाई खोप दिइनेछ ।

यस्तै जुनसुकै प्रकारको क्यान्सरको पहिचान भइ अप्रेसन गरेका तथा उपचारमा रहेका बिरामी, छातीको समस्या भइ चिकित्सकको पुर्जा बमोजिम औषधि खाइरहेका बिरामी, अंग प्रत्यारोपण गरेका, कडा खालको उच्च रक्तचाप र मधुमेह भई चिकित्सकको निगरानीमा उपचार गराइरहेका बिरामीले पनि खोप पाउनेछन् ।

कोभिड १९ विरुद्धको अन्य कुनै खोप लगाएका, १२ वर्ष भन्दा कम उमेरका र खोपको पहिलो मात्रा लगाएपछि कुनै पनि गम्भीर प्रकारको एलर्जी भएकाले खोप लगाउन नमिल्ने बताइएको छ ।

काठमाडौंमा वीर अस्पताल, त्रिवि शिक्षण अस्पताल, सिभिल, सहिद गंगालाल हृदय केन्द्र, भक्तपुर क्यान्सर अस्पताल, पाटन अस्पताल, सहिद धर्मभक्त राष्ट्रिय प्रत्यारोपण केन्द्र र वीरेन्द्र सैनिक अस्पताल छाउनी रहेका छन् ।

उपत्यका बाहिर भने मेची अस्पताल झापा, बिपी कोइराला स्वास्थ्य विज्ञान प्रतिष्ठान धरान, जनकपुर अस्पताल, बिपी कोइराला मेमोरियल क्यान्सर अस्पताल, गण्डकी स्वास्थ्य विज्ञान प्रतिष्ठान, लुम्बिनी प्रादेशिक अस्पताल, भेरी अस्पताल, डडेल्धुरा अस्पताल, कोशी अस्पताल, गजेन्द्र नारायण सिंह स्वास्थ्य विज्ञान प्रतिष्ठानबाट खोप दिइने छ ।

यस्तै नारायणी अस्पताल, धुलिखेल अस्पताल, धवलागिरि अस्पताल, राप्ती स्वास्थ्य विज्ञान प्रतिष्ठान, कर्णाली प्रादेशिक अस्पताल, सेती अस्पतालबाट फाइजरको खोप दिने ब्यवस्था गरिएको छ । सरकारले कोभ्याक्स सुविधा मार्फत सहयोग स्वरुप प्राप्त भएको फाइजर बायोएनटेक खोप १ लाख ६ सय ३० मात्रा प्राप्त गरेको छ ।