- सोमवार, कार्तिक २४, २०८३ / Monday, Nov, 09 ,2026
नेपाली कांग्रेसको १४ औं महाधिवेशन अन्तर्गत भइरहेको प्रदेश १ अधिवेशनका लागि मतदान प्रक्रिया सुरु गरिएको छ।
मतपत्रमा नाम छुटेका तीन जनालाई सर्वसम्मत गर्ने सहमतिपछि प्रदेश १ को मतदान प्रक्रिया अघि बढाइएको निर्वाचन समितिका अधिकृत भरत थापाले जानकारी दिएका छन्।
उनका अनुसार मतपत्रमा नाम छुटेका जीवन नेपाली (दलित कोटा), शान्तिकला राई (महिला कोटा) र भूगोलबाट श्याम खड्गीलाई सर्वसम्मत गर्ने सहमति भएको छ।
निर्वाचन कार्यतालिका अनुसार बिहान ८ बजेदेखि मतदान गर्ने भनिए पनि मतपत्रमा तीन जनाको नाम छुटेपछि ६ घण्टापछि मतदान सुरु भएको हो।
नेपाली कांग्रेस प्रदेश १ को अधिवेशनमा नौ पदाधिकारीका लागि २० जनाको उम्मेदवारी परेको छ। शुक्रबार भएको उम्मेदवारी मनोनयन दर्ताका क्रममा नौ पदाधिकारी पदमा २० जनाले उम्मेदवारी दर्ता गरेका हुन्।
कांग्रेसको प्रदेश १ सभापतिमा गुरूराज घिमिरे र उद्धव थापा चुनावी प्रतिष्पर्धामा छन्। संस्थापन पक्षबाट झापाका थापा र संस्थापन इतर पक्षबाट मोरङका घिमिरे प्रदेश सभापतिको भिडन्तमा छन्। प्रदेश १ मा नेता कृष्णप्रसाद सिटौला देउवा समूहसँग मिलेको छ।
