मन्त्री भट्टराईले आफ्नो जन्मदिनमा एसिडपीडित मुस्कानलाई दिए एक महिनाको पारिश्रमिक

संस्कृति, पर्यटन तथा नागरिक उड्डयन मन्त्री योगेश भट्टराईले आफ्नो जन्मदिनको अवसरमा एसिड पीडित बालिका मुस्कान खातुनलाई आर्थिक सहयोग गरेका छन् ।

नौ कक्षामा अध्ययनरत खातुनलाई अध्ययन खर्चमा सहयोग पुगोस् भनेर मन्त्री भट्टराईले एक महिनाको पारिश्रमिक प्रदान गरेका हुन् ।

सहयोग रकम प्रदान गर्दै मन्त्री भट्टराईले खातुनको आत्मविश्वासबाट आफू धेरै प्रभावित बनेको बताए । उनले भने, ‘मलाई विश्वास छ, तपाईं भविष्यमा डाक्टर बन्ने तपाईंको आकांक्षा पूरा हुनेछ । मैले अहिले दिएको सहयोग बैंकमा जम्मा गरेर भोलि डाक्टर पढ्ने बेलामा खर्च गर्नुहोला ।’ उनले एसिड पीडित बालिका खातुनसँग अप्ठेरो बेलामा मात्र नभएर सजिलो बेला पनि जिन्दगीभर सम्बन्ध रहिरहने बताए ।

भट्टराईले आफ्नो फेसबुक पेजमा खातुनसँगको भेटको प्रसङ्ग सम्झिएका छन् । गत माघ महिनामा होटल हायातमा भएको भेटलाई सम्झिँदै भट्टराईले त्यहाँको कार्यक्रममा मुस्कानको बुलन्द भाषणबाट प्रभावित भएको बताएका छन् ।

त्यही समारोहमा गरेको बचनबद्धता आज पूरा गर्छु भन्दै भट्टराईले ‘आज मेरो जन्मदिन तिनै मुस्कान र उनी जस्तै असह्य पीडामा रहेका मुस्कानहरुमा समर्पित गर्न चाहन्छु । बहिनीको शिक्षाका लागि मैले प्राप्त गर्ने एक महिनाको पारिश्रमिकमा कर र लेबी कटाएर सहयोग गरेको छु,’ भनेका छन् ।

गत वर्ष भदौ २० गते घरबाट विद्यालय जाँदै गर्दा वीरगञ्जमा खातुनमाथि दुई युवाले एसिड प्रहार गरेका थिए । एसिड प्रहारबाट घाइते उनको अहिले पनि उपचार चलिरहेको छ ।