- बिहिबार, भदौ ४, २०८३ / Thursday, Aug, 20 ,2026
नेपाली कांग्रेसका वरिष्ठ नेता रामचन्द्र पौडेल समूहले आज पार्टी कार्यालयमा विरोधपत्र दर्ता गर्ने भएको छ।
सभापति शेरबहादुर देउवाले पार्टी विधान विपरीत गरेका निर्णय सच्च्याउन माग गर्दै पौडेल समूहले विरोधपत्र दर्ता गर्न लागेको हो।
२७ जना नेताले हस्ताक्षर गरेको विरोधपत्र दिउँसो साढे १ बजे पार्टी कार्यालयमा दर्ता गर्न लागिएको पौडल समूहका केन्द्रीय सदस्य दीपक गिरीले जानकारी दिए।
‘पार्टी विधान र विधि अनुसार चल्नुपर्यो भन्ने हाम्रो शुरूदेखिकै माग हो,’ उनले भने, ‘विधान विपरीत एकपछि अर्को निर्णय हुँदै जान थालेपछि विरोधपत्र दर्ता गर्न लागिएको हो।’
पौडेल समूहले सभापति देउवाले गरेका पछिल्ला निर्णयहरु सच्च्याउनुपर्ने माग राख्दै आइरहेको छ।
शनिबार पौडेल समूहको भेलाले सभापति देउवालाई दबाब दिन विरोधपत्र दर्ता गर्ने निष्कर्ष निकालेको थियो।
विरोधपत्रमा कृष्णप्रसाद सिटौला समूहलाई पनि सहभागी गराउन पौडेल समूहले प्रयास गरेको थियो। तर, सिटौलाले विरोधपत्रमा आफ्नो समूहले हस्ताक्षर नगर्ने बताएपछि आइतबार विरोधपत्र दर्ता गर्ने कार्यक्रम रोकिएको थियो।
