- बिहिबार, भदौ ४, २०८३ / Thursday, Aug, 20 ,2026
सरकारले उज्यालो नेपाल अभियान अन्तर्गतको ‘मिनीग्रिड विशेष कार्यक्रम’ को औपचारिक शुभारम्भ गरेको छ।
राजधानीमा आयोजित एक कार्यक्रमकाबिच ऊर्जा, जलस्रोत तथा सिंचाईमन्त्री वर्षमान पुनले कार्यक्रमको शुभारम्भ गरेका हुन् । सरकारले उज्यालो नेपाल कार्यक्रम अन्तर्गतको विद्युतीकरण हुन बाँकी रहेका देशका सम्पूर्ण क्षेत्रमा विद्युतीकरण गरी आगामी ३ वर्षभित्र सबै नेपालीका घरघरमा विद्युतको पहुँच पुर्याउने उद्देश्यले यो कार्यक्रम सञ्चालनमा ल्याएको हो ।
आर्थिक वर्ष ०७६/०७७ को नीति तथा कार्यक्रम र बजेट भाषणमार्फत यो कार्यक्रमको घोषणा भएको थियो । यस कार्यक्रमका लागि ऊर्जा, जलस्रोत तथा सिंचाई मन्त्रालयबाट ‘मिनीग्रिड विशेष कार्यक्रम सञ्चालन नियमावली, २०७६’स्वीकृत भइसकेको छ ।
साथै, कार्यक्रममा हुम्लाको ताजाकोटमा ४ वटा र डोल्पाको से फोक्सुन्डोमा ४ वटा मिनीग्रिड संचालनका लागि बैकल्पिक उर्जा प्रवर्धन केन्द्रका अध्यक्ष र सम्बन्धित गाउँपालिकाबिच सम्झौतापत्रमा हस्ताक्षर समेत भयो ।
