- बिहिबार, भदौ ४, २०८३ / Thursday, Aug, 20 ,2026
नेपाल कम्युनिष्ट पार्टी (नेकपा) का अध्यक्ष केपी शर्मा ओलीले कर्णालीका नेताहरुलाई दुई अध्यक्षको निष्कर्ष मान्न निर्देशन दिएका छन् ।
शनिबार दिउँसो बालुवाटारमा कर्णालीका नेताहरुसँग भएको छलफलमा प्रधानमन्त्री समेत रहेका ओलीले कर्णालीको विवाद पार्टी केन्द्रले टुंग्याउने बताएका हुन् ।
‘तपाईँहरुले हामी दुई अध्यक्षले निकाल्ने निष्कर्ष मान्नुहोस् । अब चाँडै हामी बसेर त्यहाँको विवाद मिलाउँछौं’, प्रधानमन्त्रीको भनाई उदृत गर्दै बैठकमा सहभागी एक नेताले बताए । छलफलमा ओलीले प्रचण्डसँग बसेर कसरी अगाडि बढ्ने भन्ने टुंगो लगाउने बताएका थिए ।
कर्णालीका मुख्यमन्त्री महेन्द्रबहादुर शाही, नेकपाका सहइन्चार्जहरु प्रकाश ज्वाला र यमलाल कँडेल, सचिव मायाप्रसाद शर्मा र नेता चन्द्रबहादुर शाहीले सो छलफलमा आ(आफ्नो धारणा व्यक्त गरेका थिए ।
पार्टीका अर्का अध्यक्ष दाहाल बालुवाटारको उक्त छलफलमा उपस्थित भएनन् । उनले बिहीबार र शुक्रबार दुई पक्षका नेताहरुलाई बोलाएर छलफल गरेका थिए भने वरिष्ठ नेता माधवकुमार नेपालले पनि कर्णालीको नेताहरुबाट जानकारी लिएका छन् ।
नेकपा संसदीय दलका नेता शाहीविरुद्ध नेकपाकै १८ सांसदले अविश्वासको प्रस्ताव दर्ता गरेपछि नेकपाको विवाद थप चुलिएको छ ।
