- आइतवार, कार्तिक २३, २०८३ / Sunday, Nov, 08 ,2026
भारतीय सशस्त्र सीमा बल (एसएसबी)ले तुइन काटिदिँदा नेपाली नागरिक महाकाली नदीमा बेपत्ता भएको घटनाको वास्तविकता सार्वजनिक गर्न कांग्रेसले माग गरेको छ ।
कांग्रेस प्रवक्ता विश्वप्रकाश शर्माले शुक्रबार विज्ञप्तिमार्फत नदी तर्ने क्रममा एसएसबीले तुइन काटिदिँदा ३५ वर्षीय युवा जयसिंह धामी नदीमा खसेर बेपत्ता भएको घटना अत्यन्तै दुःखद, अमानवीय र आपत्तिजनक रहेको बताएका हुन् ।
‘घटनाको सम्पूर्ण वास्तविकता सार्वजनिक गर्न, भारतीय पक्षसँग यसबारेमा संवाद गर्न, आफ्नो नागरिकलाई न्याय दिलाउन, सम्बन्धित परिवारजनलाई राहत दिन–दिलाउन कांग्रेसका तर्फबाट म सरकारसमक्ष माग गर्छु,’ शर्माले भनेका छन्, ‘आफ्नो नागरिकको जीवन सुरक्षा गर्ने दायित्व बोकेको सरकारले यसलाई अत्यन्तै गम्भीरतापूर्वक लिएर आवश्यक गम्भीर पहलकदमी गर्ने विश्वास लिएको छु ।’
