- बिहिबार, भदौ ४, २०८३ / Thursday, Aug, 20 ,2026
इरानमा कोरोना भाइरस (कोभिड–१९) बाट पछिल्लो २४ घण्टामा दुई सय जनाको मृत्यु भएको छ ।
स्वास्थ्य मन्त्रालयले दिएको जानकारी अनुसार इरानमा एकैदिनमा कोरोना भाइरसको संक्रमणबाट सबैभन्दा धेरै मानिसको मृत्यु भएको हो । यसअघि आइतबार इरानमा १६३ जनाको कोरोना भाइरसको कारण मृत्यु भएको थियो ।
यससँगै इरानमा कोरोना भाइरसबाट मृत्यु हुनेको संख्या ११ हजार ९३१ पुगेको छ । इरानको स्वास्थ्य मन्त्रालयका प्रवक्ता सिमा सडाट लारीले मंगलबार इरानमा कोरोना भाइरसबाट मृत्यु हुनेको संख्या दिनानुदिन बढ्नु आफूहरुको लागि निकै दुःखदायी भएको बताएकी छिन् ।
उनले अहिले दिनानुदिन कोरोना भाइरसबाट मृत्यु हुनेको संख्या बढ्नुको कारण मानिसहरुको व्यवहार र काम रहेको उनको भनाइ छ ।
पछिल्लो २४ घण्टामा इरानमा कोरोना भाइरसका दुई हजार ६३७ नयाँ संक्रमित फेला परेका छन् । यससँगै इरानमा कोरोना भाइरसका संक्रमितको संख्या पनि दुई लाख ४५ हजार ६८८ पुगेको छ ।
गत मे महिनाको अन्तिममा दुई महिनाकै सबैभन्दा कम संक्रमित फेला परेदेखि नै इरानमा कोरोना भाइरसका नयाँ संक्रमित र मृतकको संख्यामा निरन्तर वृद्धि भइरहेको छ ।
पछिल्लो समय इरानमा कोरोना संक्रमण बढेसँगै इरानले सार्वजनिक स्थलमा मास्क अनिवार्य गरेको छ । अलजजिरा
