कोरोना महामारीको उद्गम थलो वुहानबारे खबर लेख्ने चिनियाँ पत्रकारलाई चार वर्षको जेल सजाय

चीनले वुहानमा कोरोना भाइरसको महामारीबारे खबर लेख्ने पत्रकारलाई चार वर्षको जेल सजाय तोकेको छ ।

चिनियाँ पत्रकार तथा पूर्व वकिल जाङ्ग जानलाई स्थानीय अदालतले दोषी ठहर गरि सोमबार चार वर्ष जेल सजाय सुनाएको हो ।

३७ वर्षकी उनलाई गएको मे मा प्रहरीले नियन्त्रणमा लिएको थियो । उनी केही महिना भोकहड्तालमा पनि बसेकी थिइन् । उनको स्वास्थ्य अवस्था कमजोर रहेको उनका वकिलले बताएका छन् ।

उनी नागरिक पत्रकार हुन्, जसले कोरोना भाइरसको उद्गमस्थल वुहानबारे खबर लेखेकी थिइन् । वुहानबारे खबर लेखेकै कारण उनीसहित धेरै नागरिक पत्रकार चीनमा समस्यामा आएको अन्तर्राष्ट्रिय संचारमाध्यमले जनाएका छन् ।

जाङ्ग सोमबार बिहान वकिलसहित अदालत पुगेकी थिइन् । उनी गएको फेब्रुअरीमा महामारीबारे रिपोर्टिङ्गका लागि वुहान गएकी थिइन् । उनले त्यहाँबाट महामारीबारे लाइभस्ट्रिमिङ्ग गर्ने तथा रिपोर्टिङ्ग गर्ने गरेकी थिइन् ।

उनका रिपोर्टहरु सामाजिक सञ्जालमा निकै सेयर भएका थिए । त्यसपछि उनी चिनियाँ अधिकारीको चासोमा आएकी थिइन् ।

उनी मे १४ मा वुहानबाट हराएकी थिइन् । त्यसको एक दिनपछि मात्रै उनलाई सांघाई प्रहरीले पक्राउ गरेको खुलेको थियो ।

उनीमाथि गएको वर्षको नोभेम्बरमा लेख, भिडियोसहितका माध्यमबाट गलत समाचार फैलाएको आरोप लगाइएको थियो । उनीमाथि विदेशी सञ्चारमाध्यमलाई अन्तर्वार्ता दिएकोसहितका आरोप पनि लागेको थियो ।

पाँच वर्षको जेलसजाय माग गरिएको भए पनि अदालतले चार वर्षको सजाय तोकेको हो