अमेरिकाद्वारा म्यानमारमा सैनिक ‘कू’ गर्ने नेताहरुमाथि प्रतिबन्ध घोषणा

अमेरिकाले ‘कू’ गर्ने म्यानमारका सैनिक नेताहरूमाथि प्रतिबन्ध लगाएको छ । अमेरिकी राष्ट्रपति जो बाइडेनले ‘कू’ गर्ने म्यानमारका सैनिक नेताहरूमाथि प्रतिबन्ध लगाउने कार्यकारी आदेशमा हस्ताक्षर गरेका हुन् ।

प्रतिबन्ध सैनिक नेता, उनीहरूका परिवारका सदस्य र सेनासँग सम्बद्ध व्यापार व्यवसायप्रति लक्षित रहेको छ । अमेरिकामा रहेको एक अर्ब डलर बराबरको सरकारी कोषमा सेनाको पहुँच रोक्ने कदम समेत वासिङटनले चाल्न लागेको छ ।

अमेरिकी राष्ट्रपति बाइडेनले सेनालाई आफ्नो कदम फिर्ता लिन र सू चीसहित जननिर्वाचित नेताहरूलाई रिहा गर्न माग गरेका छन् । आवश्यक परेको खण्डमा थप कदम चाल्ने बताउँदै बाइडनले म्यानमारका जनताले सुनाएको आवाज विश्वले हेरिरहेको उल्लेख गरेका छन् ।

यसअघि रोहिंग्या मुस्लिमविरुद्ध दमन गरेको आरोपमा म्यानमारका कैयौँ वरिष्ठ अधिकारीहरूलाई अमेरिकाले कालोसूचीमा राखिसकेको छ ।

सैन्य कू विरुद्ध म्यानमारमा प्रदर्शन चर्किँदै गएको छ । मंगलबार प्रदर्शनकारीहरूलाई तितरवितर पार्ने क्रममा सुरक्षाकर्मीले पानीको फोहरा, रबरको गोली तथा ताकेरै गोली प्रहार गरेका थिए ।

गत साता सेनाले सत्ता कब्जा गरेयता त्यसको विरोधमा हजारौँ मानिसले प्रदर्शन गर्दै आएका छन् । नेतृ आङ सान सूचीको जननिर्वाचित सरकारलाई सत्ताबाट च्युत गर्दै सेनाले एक वर्षका लागि संकटकाल घोषणा गरेको छ ।

सूचीसहित नेतालाई सेनाले नजरबन्दमा राखेको छ । ठूला जमघटहरू गर्न नपाइने नियम तथा रात्रिकालीन कर्फ्युको अवज्ञा गर्दै सेनाको विरोधमा निरन्तर प्रदर्शन हुँदै आएको छ । एजेन्सी