- शुक्रबार, कार्तिक २१, २०८३ / Friday, Nov, 06 ,2026
अमेरिकी राष्ट्रपति पदका रिपब्लिकन उम्मेदवार वर्तमान राष्ट्रपति डोनल्ड ट्रम्पले राष्ट्रपति निर्वाचनमा पराजय अझै स्वीकार गरेका छैनन् । उनले जो बाइडेनको जितको घोषणालाई अनधिकृत भन्दै सञ्चारमाध्यमहरुले दिएका समाचार प्रक्षेपण मात्र भएको बताएका छन् ।
सन् २०१६ को निर्वाचनमा आफूलाई जिताएका राज्यमा बाइडेनले जितिसक्दा पनि ट्रम्पले भने निर्वाचन नसकिएको प्रतिक्रिया दिएका छन् । भर्जिनिया रिसोर्टमा गल्फ खेल्न पुगेका ट्रम्पले जो बाइडेन विजेताको रूपमा सञ्चारमाध्यमको घोषणा गलत भएको बताएका हुन् ।
उनले सञ्चारमाध्यमले सत्य बाहिर ल्याउन नचाहेको प्रतिक्रिया समेत दिएका छन् । उनले निर्वाचनको नतिजा सञ्चारमाध्यमको प्रक्षेपण भन्दै त्यसलाई निर्वाचन अधिकारीहरूले प्रमाणीकरण नगरेको पनि दावी गरेका छन् ।
ट्रम्पले सोमबारदेखि आफ्नो टोलीले अदालतमा मुद्दा हालेको र अदालती निर्णयपछि मात्र विषय टुंगिने पनि उल्लेख गरेका छन् । ट्रम्पले आशा गरेका पेन्सिल्भेनिया, विस्कन्सिन, मिचिगन, एरिजोना जस्ता राज्यमा बाइडेनले जितिसकेका छन् । निर्वाचन आयोगले अन्तिम परिणाम भने सार्वजनिक गरिसकेको छैन । एजेन्सी
